VAWKSA KG ZAT CHHÛT CHHUAH DAN

Hriatzau nan :

VAWKSA KG CHHUT CHHUAH DAN CHI THUM :

Hriata Khiangte

Vawksa Kg chhutchhuah dan Formula :

1. A len zawng (inches) atangin 25 paih a, chumi chhuak chu 5 a puntir leh tur.

Entirnan, vawk len zawng chu inchi 50 ni ta se :

50 - 25 = 25

25 x 5 = 125

Kg 125 vel a chhuak dawn tihna a nia.

A kg chhuak zat hi sa kg rate-in han puntir ila, sa kg 1 Rs 250 ni ta se :

125 x 250 = 31,250

A lo berah vawk inchi 50 a lian chuan 25000 - 30000 bawr chho a man dawn tihna nih chu. Hetianga chhut hian vawk ka hralh tlangpui. Sa sata ka hralh chuan an hlep tur ka hisap tel ve thin. Sa sat ho hian an ngamna tawk an sawi pawh hian a sual lo thin khawp mai. A vawk sei lam a zir tein a danglam ve thei a, a tlangpui chuan a dik thawkhat viauin ka hria an ti.

2. Kei chuan a inchi zat kha 3-in ka puntir a, a sual lo khawp mai. 

Entirnan :

Inches 50 × 3 = 150. 

Krismas vawk kan lei pawh inchi 53 a ni a, 3-a kan puntir chuan 159 a chhuak. Kan sah hnua kan buk vel hnuah (uai nelh nawlh vekin kan buk) kg 160+ a chhuak daih mai. A vawk rawng a seiin a pian a tha bawk a. 

Bazar a vawksa sat a sumdawng ni ngat ila chuan kg 180 chu kan sat chhuak ngei ngei an ti.

3. Vawk kg zat ka chhut dan ve thung :

Inchi zat aṭangin a zahve ka paih phawt a, chumi hmuah 13 paih lehin a chhuak number tawp berah bial kan dah belh ṭhin.

Entirnan :

Vawk inch 50 ni ta se.

50 - 25 = 25

25 - 13 = 12

120 kg a chhuak

Vawk pian a zirin a chhuak hnem thei bawk.

Buk dik taka buk chuan a chhuak hi chu a sual mawh khawp mai an ti. Vawk kan hralh pawh hian vawk sertu te hian hlâwk lo an inti ṭhin viau mai niin a sawitu pa chuan a ti.