LAWM LO THEI RÊNG KA NI LO

– V Kungtea

Lâwmthu i’n sawi hluai teh ang. Mihring leh khaw chin hriat a ni si lo va; hetia, in zînga ka tel theih lai hian in chunga ka lâwmthu sawina hi min lo ngaihthlâksak hrâm tûrin kohhran mipuite ka ngên mawlh mawlh a che u.

Mi nihlawh ka va ni êm!: Zâwlnei Habakuka chuan, “Theipui thing pâr vul dâwn lovin grêp hrui rah dâwn hek suh sêng; Olive thing pawh rah lovin, lovin ei tûr chhuah dâwn lo sêng, huang ata ran rual tibovin, ran inah ran awm lo mah sêng; ka lâwm zel ang, LALPA-ah chuan, ka chhandamna Pathianah chuan ka lâwm cheu dâwn,” (3:17,18) tiin a țawngțai a. Ani, Lalpa mi hriat leh zâwlnei ropui, Thlarau Thianghlim nên pawha inkâwm nêl zâwk leh tuitla zâwk mah, a rin Pathian tâna engkim chân pawh ni se a la lâwm cheu tûr thu a sawi laiin, kei, eng mah ni lo, hmeichhe pakhat hrin ve mai, chân tûr pawha neih rêng nei zo lo hian mite ngaihsak leh khawngaih ka la hlawh fo zâwk hi piang zawng zawng zîngah mi vânnei leh nihlawh ber ka ni hial âwm e.

Lâwm lo zia ka ni em ni?: Ni e, kei, eng mah ka nih lohzia leh khawtlâng leh kohhranah țangkaina pawh nei lo tih te chu tlâng hriat. Chuti taka țangkaina nei si lo hi, tûn thlenga ensan leh kohhran huang ata hnawhchhuah ka la tâwk lo te hi a vs ropuiin ka va lâwm tehlul êm! Kohhran hruaitute leh țhalai hruaitute chungah mawlh hian ka lâwm țhîn. Mi an tlawh âwl lo va, “Nang chu țangkaina i nei chuang lo; kohhran hming ziahnaah pawh kan thaichhe mai ang che,” emaw, “Pawisa pawh i rawn thawh ve a ngai lo vang; eng tham mah a ni chuang hleinêm. I pawisa kher lo pawhin kohhran hi a la kal zêl thei alâwm,” emaw pawh ti lova dawhthei taka ka chunga zahngaihna an lantîr fo țhin avâng te hian lâwm lo thei ka ni lo.

An duh phawt chuan min chêksawlhin min hnungchhawn thei. Min en kân ta deuh pawh ni se, a vuiawm loh va, âwm lah a âwm lo bîk chuang lo. Ka hnêna ata eng mah beisei tûr an nei lo tih pawh ka hria. Mahse, a lian ber leh thil ti thei ber an ena an ngaih ang thovin ka chungah an rilru țhatna an rawn lantîr a; thawhlâwm ni se, kei ka nih avângin min thawhtîr tlêm bîk hran lo va; ka sum thawh theih ang ang, chhuan tlâk loh fahran pawh ni mah sela, lungâwi lo hmêl pu lova hlim taka lo min dawnsaka min lo pawmsak ve țhîn avângin ka va lâwm leh pêk êm! A ni, lâwmthu sawina tûr hi a va tam ngai ve.

Ka tâna hmuh theih vântirhkohte an ni: “Lungpui pawh lungtêin a kamki loh chuan...,” eng nge a chhunzawmna kha? A bîk takin țhalai huangah te hian min beisei leh min phût vâng te ni miah lo hian, “Eng nge, nang, i ti thei dâwn em?” emaw, “Rawn tel ve rawh aw? Hei, kan awm a nia!” te an han tih meuh hi chuan an tlâwmngaihna âw mah ni se, “Ka tel lovin an sêra mu a thûr thei lo em maw ni le? Engah nge kei kher kher chuti tak maia mi han țah-awh tâk chiam mai le?” han tih mai te pawh awl zât e! Ni lo, min țah-awh a ni lo, krista nun dân an lantîr mai a ni zâwk. Kristian tak tak nun hi zawng a mâwi mang e tir’u? Mi țhenkhatin mi piangthar lo, kristian inti tho site nun (kristian der) ațangin kristian tak tak nun hi hmuh phêt an tum țhîn a, engtin tak hmu thei ang maw? Kristian tak tak nun chu kristaa piangtharte hmêlah chauh a lang si a. Kristian tak tak nun chu ka sawi ang khi a ni.

Ni e, chuti khawp chuan kan hruaitute hi an felin an tlâwmngai a; ka chungah mah heti fakauva țhat an chhuaha tlâwm an ngaia, an fel thei a nih chuan mi dang chungah chuan eng ang tlukin fel ang maw? Îtsîktu, tu tu emawte’n an tlin lohna leh fel lohna an sawi te hian âwih a har ka ti. Ka beng arâwngah phei chuan ka thun duh ngai lo. Mahni hma ka sial vâng ni maw? Ka chunga an felna khân ka thinlung a hneh a ni mahna, ka chunga fel êm êmte han dempui tûr êm chuan ka chhia leh țha hriatna hian a ngam lo va, ka tlin hek lo. An fel tâwk lohna chu ngaihzama hmuh kân mai pawh ka pawi ti lo. 

Chu chang a ni nêm le! Hritlâng, damlo, hnung thak ilo fahran ka tawh chânga ka hming hnaisai lo tak lam meuhva Pathian biak in zahawm takah ka dam lehna tûra min țawngțaisak țhîntute kha tunge? Kohhran hruaitute hi an ni! Hêng avâng te hian ka lâwm lo vang em ni? Hnai lo ve! Ka lâwmthu hi kohhran mipuite hriatah leh Pathian hmaah ka sawi ngei ngei tûr a ni. Keiina ka tih theih leh ka sawi theih chu hetia lâwmthu sawi chauh hi a ni mai.

Lawmthu chauh sawi na nâ nâ hi chu lei a kuai lovin sawi lah a harsa lo êm a, ka sawi a ni mai a; ka lâwmna tak tak zâwk erawh chu mihring țawngka maia sawi chhuah theih pawh niin ka hre lo. Vâna vântirhkohte meuh pawhin ka thinlung lâwmna hi min țâwmpui phâk kher lo vang. Lâwm avângin ka hlim a, lâwm avâng bawkin ka nui bawk a, lâwm avâng vêkin ka țap a, lâwm avângin ka mittui hi a luang reng mai a nih hi le!

A tâwp berah chuan: Pathianin Ama rawngbâwl tûra a ruat kohhran hruaitu zahawm tak takte, țhalai hruaitu zahawm tak takte, ka hma ngai êm êm țhîntu, ka tâna Samari mi țha tak takte, ka chhiat ka țhat, ka nihna ang anga min pawm țhîntute avângin ka thla a muang a, mihring ka tlin tawh loh hnu pawha thinlung  taka min vûi liamtu tûr pawh vawiina ka chunga țha êm êm, kohhran hruaitute chauh hi an ni. An ni vâng hian alâwm, he anchhedawng khawvêl hrehawm pawh hi nuam ka tiha dam ka la thlâkhlelh êm êm reng chhan pawh hi ni. He lei ațang hian vânram nawmna tem lâwk miau hek i. “Kei atân zawng nun hi Krista a ni si a, thih pawh hlâwkna a ni,” (Philippi 1:21).

Chhiartu zawng zawngte Lalpa’n malsâwm che u rawh se. Amen.